Нема да ја заборавам никогаш мојата прва посета таму. Беше почетокот на jануари. Зима…Работевме на еден проект  што произлезе дека е еден од моите најдобри. Ми беше кажано од моите тамошни пријатели дека температурите може да паднат и до минус 30 во тој период од годината. Од друга страна пак, некои девојки што ги познавам постојано зборуваа за Естонија и Талин како еден од најубавите престолнини во Европа,познат како  градот на љубовта.Интересно  е за   секој кој доаѓа од сончева медитеранска земја, воглавном планинска со многу високи врвови, што оди во рамниот, смрзнат и облачен север  за 3 часа летање од дома? Пренатрупан со практични информации, растргнат помеѓу импулсот на срцето што го следи и студениот, крут разум кој донесува одлуки но сепак одлучен да го проживее најдоброто што ти се нуди…

Ја спакував     торбата со повеќе топла облека и го подготвив разумот со цврст став дека нема да дозволам ништо да ми го расипе мојот 12 дневен престој со пријателите.Сакав  да ги изживеам овие денови како да се последни, со максимално уживање.

И се случи! Го кршев мразот и стереотипите низ снегот на улиците на Талин.Беше минус 28 токму таа вечер за добредојде. Веднаш учев  некои начини и трикови од локалните жители како да се стоплам. Една недела бевме на тренинг во местото Ванауе.  Каква глетка. Разиграни животни во снегот .Вистинска магија …Сончеви периоди преку ден а ноќе дрвјата сјаат како да беа украсени со кристали на месечевата светлина која доаѓаше од темното чисто бескрајно небо . Просечната температура беше околку минус 15-20 степени но никој веќе не обрнуваше внимание на тоа. Да…ако сакате да се вљубите во зимата, студеното време и снегот-Естонија е вистинското место за тоа.

И потоа имавме   една кратка посета на гратчето Виљанди.Затрупано со снег во тој период од годината  зрачеше со сончевата светлина и го  имаше претворено во место од бајките.   Ме импресионира  еден стар град и замокот во Виљанди, со историски музеј и величенствен поглед надолу од урнатините на блиското смрзнато езеро каде децата со лизгалки се забавуваа до доцна вечерта.

Од мојот прв престој во Естонија сеуште го држам нивното национално знаме на моето работно биро дома. Тоа е поздрав од една синоока естонка и лична фотографија на десктопот од лаптопот од смрзната река и залез на Сонцето зад дрвјата покриени со снег.

Скоро две години подоцна повторно бев возбуден со планирање на мојата втора посета. Сега веќе знаев каде да одам, што да видам и пријатели кои ќе ги посетам. И уште еднаш слетувам на Ленарт Мери аеродромот во Талин, еден од моите омилени. Мал но со многу стил, уникатен секогаш со топол пречек. Повторно ќе бидам надвор во природа, Алтмоиса пансионот, околу 100 км југозападно од Талин, во регионот на Хапсалу близу до морето и Националниот парк Матсалу. Сеуште зима, помалку снег, не толку студено и сега веќе добро познатиот бескраен хоризонт, да помислиш дека залезот на Сонцето трае цела вечност. Цела недела помината таму со нова група од пријатели . За  мене  тоа е  омилениот неформален пристап на едукација, неформални разговори и вмрежување. Прекрасно и корисно  потрошено време за прошетките на отворено или вечерите во сауна и најдобрата естонска храна, толку добра што лично донесов неколку рецепти дома да бидат составен дел од мојата секојдневна исхрана. Бевме на  само 20 минути пешачење до морето каде понекој пријателски настроен елен ќе се загледа во тебе преку ден или доцна во ноќите, под чистото ѕвездено небо се слуша завивањето на волците во далечината.

На враќање уште една кратка тура низ Талин, со новите пријатели да понесеме дома свежи импресии од убавините на овој град и заминуваме, до следниот пат. Да, за мене ќе има повторно следен пат.

И би сакал да споделам неколку работи за Естонија што ги научив и слушнав. Многу добро познатиот естонски `ржан црн леб што стана мој омилен како и темното чоколадо, можеби најдоброто што сум го вкусил. Тие употребуваат доста аронија или сибирска боровинка, најдоброто овошје анти-оксиданс. Го ставаат и во бокал со вода заедно со билки, лимон или портокал и така добивате одличен напиток за детокс за цел ден. Естонија околу 50 проценти е под шума и голем дел од кислородот за дишење во Европа доаѓа од овде. Покриеноста со безжичен интернет е зачудувачка: го има дури и во шумите. Тие се прилично ИТ нација. Скајпот како алатка за комуникација е измслен овде, од естонците. Естонија има преку 2000 островчиња и за време на зимските ниски температури кога морето смрзнува, се отвараат патишта по кои може да возите до околните острови. Како мерка за безбедност е појасот во автомобилот треба да биде откопчан. Исто така според законот граѓаните мора да имаат рефлектирачки додаток закачен за облеката, да бидат безбедни и видливи за време на мрачните зимски денови.

А Талин, градот на љубовта…Ако го посетувате имајте на ум дека тој е на 80 км оддалечен од Хелсинки. Имате ефтин автобуски превоз до Рига, Латвија од овде и исто така организирана посета на Санкт Петерсбург, Русија, за која не ви е потребна виза. Да, Естонија е навистина место што треба да се посети!

Горан Галабов