Пешти, Преспа, Водно… Овие три прекрасни локации во Македонија станаа почисти и поубави откако изминатиот месец ги посетија младите ентузијасти од неформалното здружение „За почиста Македонија“. Станува збор за екипа формирана во јуни годинава како дел од проектот: “European Youth at the frontlines of active citizenship: A Roadmap towards a collective South-North-East-West Momentum” организиран од Волонтерски Центар Скопје, а поддржан од Европската комисија преку програмите Ерасмус+ и „Европските млади заедно“, чиј учесник е и нашиот волонтер и активист Петар Стевановиќ.

„Нашите членови се залагаат за промени во врска со зачувување на природата и одржување на чиста околина. Целта ни е да ги одржиме планините чисти и убави какви што заслужуваат да бидат за да може сите да уживаме во нив. Од тие причини во наредниот период ќе спроведеме низа ’Еко акции’ за собирање на расфрлан отпад во националните паркови, шуми и планини во близина на Скопје“, вели Стевановиќ.

Првата таква голема акција е закажана за 30 август (недела), при што предвидено е собирање на отпад на средно Водно, врв на Водно и патеките до врвот.

„Идејата е да се собере расфрланото ѓубре и да се постават знаци и табли со мотивациски пораки за одржување на чиста природа. Поради ситуацијата со ’Ковид-19’ се очекува лимитирана посетеност од околу 50–60 луѓе. На настанот ќе се почитуваат и применуваат сите мерки за заштита од вирусот“, нагласува Стевановиќ.

Младите активисти апелираат до граѓаните да се однесуваат совесно додека уживаат во природата. Нивното мото е: Не барајте човек за пример, бидете еден!

Горан Адамовски